S erschte Schtammlokal isch d'Brauereywirtschaft zum Warteck an der Gränzacherstrooss gsi. In de fuffzger Joor isch dr Schtamm denn ins Beggerstiibli an dr Wääbergass verleggt worde und 1974 sinn mir in d Fischerstuube in d Rhygass ziiglet, wo mer hitte no sinn.

Nääbe-Schtammlokal hämmer nadyyrlig au ka, zem Byyschpil s Restaurant Hildebrand am Wettstaiblatz, hitte haissts "Resslirytti", s Restaurant Helvetia, wo Egge Alemannegass/Theodorsgraabe gsii isch. Bi der Mamme Sattler im Krischtallpalascht, wie s Riechetorstiibli bi uns ghaisse het, sinn mer eebeso gärn gsässe wie au in dr Linde oder im Rääbhuus. Nadyrlig sinn an dr Fasnacht dr Gryffe und dr Laie nit z kurz ko und alli, wo iibrig bliibe sinn, hänn sich denn, wenn d Veegel scho bald wiider pfiffe hänn, im Clara-Variete wiider droffe. Will mer unseri Waagewänd z Birsfälde im Schuelhuus dien moole und au d Larve dert mache, drifft me-n-is vor dr Fasnacht eppe-n-au im Lerchegarte aa.

In de nyynziger Joor het me uns au efters nach em Hogg bim Charly und dr Carmen im Ysebähnli kenne aaträffe. Au in dr Linde, grad nääbe dr Fischerstuube geen mir gärn ain go kippe. Nit z vergässe, dr mittlerwyyle scho dradizionell Fondue-Oobe wo mir deert jeedes Joor dien gniesse.

D Herremättli hänn aigentlig nur zwai Tradizioone.

S ainte sinn unseri Schwarzwiirscht. Wenn die zem erschte Mol verdailt worde sinn, isch nimme bikannt. Allerdings isch es hitte schwär, e Metzger z finde, wo die no macht und vor allem guet macht - und do hämmer mit em Metzger Aeschlimaa vo Biel-Bängge vor eppe 15 Joor aine gfunde, wo-n-is Subberwiirscht liiferet (vyyle Dangg).

Die zwaiti Tradizioon isch, das mir nie Waggis sinn, sondern jeewyyls uff s Sujet bezoogeni Larve und Goschdym draage. Anno 1921 sinn d Waggis au noonig eso in Moode gsii, wie das hittigsdaags der Fall isch.